עמוד 120

עמוד קכ, ויקרא, פרשת צו פרק ח פסוק ח:יד עד ח:לד

ויסמך אהרן ובניו את ידיהם על ראש פר החטאת

וישחט ויקח משה את הדם ויתן על קרנות המזבח

סביב באצבעו ויחטא את המזבח ואת הדם יצק

אל יסוד המזבח ויקדשהו לכפר עליו ויקח את

כל החלב אשר על הקרב ואת יתרת הכבד ואת

שתי הכלית ואת חלבהן ויקטר משה המזבחה

ואת הפר ואת ערו ואת בשרו ואת פרשו שרף

באש מחוץ למחנה כאשר צוה יהוה את משה

ויקרב את איל העלה ויסמכו אהרן ובניו את ידיהם

על ראש האיל וישחט ויזרק משה את הדם על

המזבח סביב ואת האיל נתח לנתחיו ויקטר משה

את הראש ואת הנתחים ואת הפדר ואת הקרב

ואת הכרעים רחץ במים ויקטר משה את כל האיל

המזבחה עלה הוא לריח ניחח אשה הוא ליהוה

כאשר צוה יהוה את משה ויקרב את האיל השני

איל המלאים ויסמכו אהרן ובניו את ידיהם על

ראש האיל וישחט ויקח משה מדמו ויתן על תנוך

אזן אהרן הימנית ועל בהן ידו הימנית ועל בהן

רגלו הימנית ויקרב את בני אהרן ויתן משה מן

הדם על תנוך אזנם הימנית ועל בהן ידם הימנית

ועל בהן רגלם הימנית ויזרק משה את הדם על

המזבח סביב ויקח את החלב ואת האליה ואת כל

החלב אשר על הקרב ואת יתרת הכבד ואת שתי

הכלית ואת חלבהן ואת שוק הימין ומסל המצות

אשר לפני יהוה לקח חלת מצה אחת וחלת לחם

שמן אחת ורקיק אחד וישם על החלבים ועל שוק

הימין ויתן את הכל על כפי אהרן ועל כפי בניו

וינף אתם תנופה לפני יהוה ויקח משה אתם מעל

כפיהם ויקטר המזבחה על העלה מלאים הם לריח

ניחח אשה הוא ליהוה ויקח משה את החזה ויניפהו

תנופה לפני יהוה מאיל המלאים למשה היה למנה

כאשר צוה יהוה את משה ויקח משה משמן

המשחה ומן הדם אשר על המזבח ויז על אהרן

על בגדיו ועל בניו ועל בגדי בניו אתו ויקדש את

אהרן את בגדיו ואת בניו ואת בגדי בניו אתו ויאמר

משה אל אהרן ואל בניו בשלו את הבשר פתח

אהל מועד ושם תאכלו אתו ואת הלחם אשר בסל

המלאים כאשר צויתי לאמר אהרן ובניו יאכלהו

והנותר בבשר ובלחם באש תשרפו ומפתח אהל

מועד לא תצאו שבעת ימים עד יום מלאת ימי

מלאיכם כי שבעת ימים ימלא את ידכם כאשר

עשה ביום הזה צוה יהוה לעשת לכפר עליכם

Post a Comment

Your email is never published nor shared. Required fields are marked *

You may use these HTML tags and attributes <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

*
*

This site uses Akismet to reduce spam. Learn how your comment data is processed.